Ang pulong nga “kasina” o “kasuya” gihubit sa Oxford Dictionary ingon ang pagkaibug sa kung unsa ang naa sa uban ug ang pagpanalipod sa kaugalingong mga katungod o mga pribilehiyo. Samtang adunay tin-aw nga kalainan tali sa duha ka mga kahulugan, dili ikalimod nga sila sab adunay kalabotan.
Usa sa mga kinaiya sa kasuya mao ang kompetisyon. Kung ang usa ka tawo makig-kompetinsya, dali siyang mahadlok ug mobati’g kapildihon. Sa diha nga siya makakita sa butang nga iyang gitinguha nga maangkon sa lain, mahimo siyang mobati og kapaitan ug kahulga ug busa gusto nga mokontrol ug mohimo og mga lakang sa pagkab-ot sa unsay iyang gihunahuna nga angay kaniya sa unang dapit. Sa pinakalabing sirkumstansya, magsugod siya sa pagpakita og labing makadaot nga mga kinaiya.
Sa dihang nahimuot ang Diyos sa halad ni Abel sa halaran ug dili kang Cain, si Cain mibatig kasuya ug nagtanom ug kasuko sa iyang kasingkasing. Sa ulahi sa hilabihan, iyang gipatay ang iyang igsoon nga si Abel. Sa dihang gihatagan si Jose ug usa ka dekolor nga kupo nga gihimo sa iyang amahan nga si Isaac, ang iyang onse ka mga igsoong lalaki nasina ug sa ulahi nagkunsabo sa pagpatay kaniya. Kining mga panghitaboa nagpamatuod sa mga sangpotanan sa pagtugot nga ang atong emosyon maoy mokontrolar, ug kini duha lamang sa mga nagpamatuod sa Bibliya nga ang katawhan ulipon gayod sa sala.
Bisan gani ang mga magtutuo sa mga taga-Corinto, kinahanglan nga atubangon ni Apostol Pablo aron sa paghan-ay sa ilang mga panagbangi resulta sa ilang mga kasina (1 Mga Taga-Corinto 3). Nagpasabot lang kini nga isip mga magtutuo, mahimong makigbisog usab kita sa kasina o kasuya. Busa, padayon natong pun-on ang atong hunahuna ug kasingkasing sa Pulong sa Diyos. Ipaubos nato ang atong mga pagbati sa kabubut-on sa Dios. Mag-ampo kita nga bag-ohon sa Espiritu ug Siya maghatag kanato ug mapaubsanon ug matudloan nga kasingkasing. Atong pangayuon ang gipangayo sa Salmista:
“Putlia, O Dios, ang akong kasingkasing ug hatagi akog bag-o ug masinugtanong espiritu.” (Mga Salmo 51:10)
Samtang ang Balaang Espiritu naglihok dinhi kanato aron sa pagbag-o sa kinaiya sa atong huna-huna (Efeso 4:23), atong tukuron ang makanunayon nga pagpasalamat sa grasya ug kaluoy sa Diyos pinaagi sa atong Ginoong Jesu-Kristo pinaagi sa pagpahinumdom sa atong kaugalingon sa Ebanghelyo.
“Papuy-a sa inyong kasingkasing ang bahandianong mensahe ni Cristo. Pagtinudloay ug pagpahimangnoay kamo uban sa tanang kaalam. Pag-awit kamog mga salmo ug balaang mga alawiton ug awiti ninyo ang Dios uban sa pasalamat diha sa inyong mga kasingkasing.” (Mga Taga-Colosas 3:16)
Dili nato i-uyon atong kaugalingon sa modelo niining kalibutana, kondili magbag-o kita pinaagi sa pagbag-o sa atong mga hunahuna. Dayon kita makahimo sa pagsulit ug pag-uyon kon unsa ang kabubut-on sa Dios—ang Iyang maayo, makapahimuot, ug hingpit nga kabubut-on (Roma 12:2).
