Si Samson usa ka Nazareo, gipahinungod ngadto sa Dios gikan sa pagkahimugso, kansang
misyon mao ang pagluwas sa mga Israelita gikan sa pagpanglupig sa mga Pilisteo (Mga
Maghuhukom 13:1-25). Gihatagan siya sa Diyos ug talagsaong gahom, nga iyang gigamit sa
pagpildi sa iyang mga kaaway. Apan, siya madalidalion sa pag-desisyon ug huyang pag-abut sa
mga babayeng Pilisteo. Bisan pa sa iyang kahibulongang mga buhat, sama sa pagbuntog sa usa
ka leon ug pagpatay sa usa ka libong mga Pilisteo gamit ang sa usa ka bukog sa apapangig, ang
tinguha ni Samson alang sa mga babayeng Pilisteo nagpahisalaag kaniya. Nahigugma siya sa usa
sa mga babayeng Pilisteo nga gihinganlag Delila (Mga Maghuhukom 16:4-21), kinsa
nakigkonsabo sa mga pangulo sa Pilisteo aron sa pagdiskobre sa sekreto sa iyang kusog. Human
sa pipila ka pagpanglimbong ni Delila, misupak sa sugo sa Diyos si Samson ug gipadayag niya
nga ang iyang kusog naggikan sa iyang walay putol nga buhok. Samtang siya natulog, nagbudhi
si Delila kaniya pinaagi sa pagputol sa iyang buhok, hinungdan nga nawala iyang gahom.
Pagkahuman niana, siya gibihag sa mga Pilisteo, gilugit ang iyang mga mata, ug gibiaybiayan na
lamang (Maghuhukom 16:21-22).
Usahay, kon dili sa tanang panahon, sama kita kang Samson. Ang Dios naghatag kanato og
maayong panglawas ug igong kalig-on sa pagbuntog sa matag adlaw, apan imbis nga magpabilin
ang atong pagsalig Kaniya, kita malimot hinuon kaniya ug unya mosalig na hinuon kita sa atong
kaugalingon. Tungod niini, kita mahulog dili lamang ngadto sa mga lit-ag sa kaaway apan
ngadto usab sa sala, nga mosangpot sa kasakit ug pag-antus. Sa maong paagi lamang kita
makahinumdom sa Diyos. Sa laing bahin, kining kamatuoran kinahanglang dili sayopon
pagsabot. Ang kasakit ug pag-antus sa pagkatinuod duha nga gigamit sa Dios sa pagpaduol Niya
kanato ngadto Kaniya ug sa pag-hulma kanato ngadto sa dagway ni Kristo, apan kinahanglan
gayud natong likayan ang tuyo’ng pagpahamtang niining duha diha sa atong kaugalingon,
hangtod sa puntong pagbiay-biay sa atong testimonya isip mga Kristohanon.
Ang Dios wala mahimaya o malipay sa atong binuang nga paglakaw isip mga magtutuo. Si
propeta Isaias nagsubo niining paagi sa pagkinabuhi ingon sa iyang giingon sa Isaias 31:1, “Alaut kanila nga manugbong sa Egipto aron tabangan, ug managsalig sa mga kabayo, ug managsalig sa mga carro tungod kay sila daghan, ug sa mga magkakabayo tungod kay sila mabaskug, wala managtutok sa Balaan sa Israel, ni mangita kang Jehova,” ug propeta Jeremias sa 17:5, “Mao kini ang giingon ni Jehova: Tinunglo kadtong tawo nga nagasalig sa tawo, ug nagahimo sa unod nga maoy iyang kusog, ug kansang kasingkasing mibiya kang Jehova.”
Busa, dili kita mahisama kang Samson nga misalig sa iyang kaugalingon. Hinonoa, mahisama
kita kaniya nga bisan sa una wala siya mituman, mibalik gihapon siya sa Dios sa pagpaubos ug
pagsalig, kay ang Dios maloloy-on man. Atong sundon ang giingon ni Haring Solomon, “Salig sa
Ginoo sa bug-os mong kasingkasing ug ayaw pagsalig sa imong kaugalingong pagsabot; sa
tanan nimong mga dalan ilha Siya, ug Siya magamando sa imong mga alagianan (Proverbio
3:5-6).” Pinaagi sa grasya sa Dios, maningkamot kita nga “… maglakaw nga takus sa Ginoo,
nga makapahimuot kaniya sa hingpit, nga mabungahon sa tanang maayong buhat ug
nagatubo sa kahibalo sa Dios (Colosas 1:10).”
“Siya nga nagasalig sa iyang kaugalingong kasingkasing maoy usa ka buang, apan bisan
kinsa nga nagalakaw nga maalamon maluwas (Proverbio 28:26).”
“Ang uban nagsalig sa mga karwahe, ug ang uban sa mga kabayo; apan kita, atong
hinumdoman ang ngalan sa Ginoo nga atong Diyos (Salmo 20:7).”
